andar kā zahr chuum liyā dhul ke aa ga.e

andar zahr chuum liyā dhul ke aa ga.e

kitne sharīf log the sab khul ke aa ga.e

sūraj se jañg jītne nikle the bevaqūf

saare sipāhī mom ke the ghul ke aa ga.e

masjid meñ duur duur koī dūsrā na thā

ham aaj apne aap se mil-jul ke aa ga.e

nīndoñ se jañg hotī rahegī tamām umr

āñkhoñ meñ band ḳhvāb agar khul ke aa ga.e

sūraj ne apnī shakl bhī dekhī thī pahlī baar

ā.īne ko maze bhī taqābul ke aa ga.e

anjāne saa.e phirne lage haiñ idhar udhar

mausam hamāre shahr meñ kābul ke aa ga.e

RAHAT INDORI

Leave a Reply

Your email address will not be published. Required fields are marked *